政Whats噏：南區延議員分娩缺席期　陳家珮受惠

新民黨南區區議員陳家珮（Judy）喺成功爭取懷孕議員權利上，可謂戰績彪炳，最近又有新戰績。Judy喺Facebook上載咗幾幅南區區議員嘅合照，指周四(8日)「區議會一致通過，豁免因分娩而缺席會議出席率的時限，由十周增至十四周」，意味將於聖誕生B嘅佢將可立刻受惠。

其實南區有呢個分娩豁免出席率嘅安排，正係兩年前Judy懷孕時提出並獲區議會接納。Judy又自爆已懷孕三十一周，指「BB係我的聖誕禮物」，暗示預產期喺聖誕節，換言之，新措施首名受惠者，極大機會係Judy，難怪佢忍唔住多謝區議員同事喇。根據《區議會條例》規定，如區議員連續三次缺席區議會大會，將會被取消議員資格，故區議會訂立因分娩缺席的安排。

該黨近期喜事重重，Judy同黨友、立法會議員容海恩（Eunice）都大肚，雖然Eunice爭取產假期間遙距投票仍未有進展，反觀選輸咗立法會香港島補選嘅Judy，爭取力度似乎比身在立法會嘅Eunice更強。