政Whats噏：致謝議案唔投票　莫乃光話食咗瀉藥

立法會尋日(9日)就施政報告致謝議案辯論及投票，但多名議員都冇投票就走咗去，包括同屬專業議政嘅資訊科技界議員莫乃光(Charles)及會計界議員梁繼昌(Kenneth)。因乜解究佢哋唔投票呢？Charles就話，因為約咗醫生今日(10日)做身體檢查照腸鏡，尋日要食瀉藥清乾淨啲腸，結果下午5時許就離開咗立法會喇！致謝議案一早列於議程，為咗做檢查而唔投票，又講唔講得過去呢？

Charles就話，自己已經50幾歲，要定期做身體檢查，仲反問︰「唔通等到65歲先做咩？」又話醫生嘅預約時間都排得好滿，所以冇特登改期，認為自己嘅一票都影響唔到投票結果喎。

同佢一樣冇投票嘅仲有Kenneth、商界議員廖長江、法律界議員郭榮鏗及議員陳淑莊，Kenneth仲係喺修正案投票期間突然早走。佢解釋，雖然業界對施政報告提出嘅好多政策都接受，但對明日大嶼填海計劃財務方案就有保留，不論投贊成票定反對票都唔應該，所以佢就唔投票喇。至於廖就話當日有事要離港，已同其他建制派議員協調。