政Whats噏：孔聖誕日擬變公眾假　兩局鬥卸膊

政府自2014年將9月第三個周日訂為「香港孔聖誕日」後，孔教更想將嗰日訂為公眾假期，提出用復活節最後1天假期嚟替換。呢個建議唔單止激起宗教界嘅爭論，搞到政府內部都好頭痕。立法會體育、演藝、文化及出版界議員馬逢國透露，政府有意接納呢個替換假期嘅建議，但就踢爆勞工及福利局(勞福局)同民政事務局(民政局)互相卸膊，拒絕牽頭上身，令事件原地踏步多年。據悉，最新進展係民政局「推莊」失敗，將接手跟進有關建議。

馬逢國話，為打工仔制訂公眾假期係勞福局負責，至於係為咗乜嘢內容去放假呢，就由民政局去釐定，所以要將孔聖誕日訂為公眾假期，兩個局都責無旁貸。不過，佢批評兩個政策局嘅態度「卸得就卸」，互相將牽頭責任推來推去，搞到至今仍未有任何進展。無人肯認頭，爭取者惟有用「大包圍」方式爭取，例如馬逢國早前在立法會向勞福局提書面建議，至於孔教學院院長湯恩佳就透露曾去信民政局爭取。但無論問邊個部門都好，結果都係等候回覆。

政府消息人士透露，其實政府早已為孔聖誕日「升呢」做公眾假期鋪路，例如孔教學院喺今年9月孔聖誕日活動，勞福局局長羅致光同民政局局長劉江華都有出席，消息人士更指，當日只有劉江華上台發言，其實已經暗示稍後將會交由民政局負責。

據了解，現時孔聖誕日「升呢」公眾假期嘅最大爭議係來自宗教界。根據法例，香港公眾假期每年有17天，將孔聖誕日「升呢」意味要將目前1天公眾假期作替換，而湯恩佳等支持者早就開聲話要用復活節最後1天假期換做孔聖誕日，自然引來相關宗教反彈。

據悉政府未決定係咪採用取消1天復活節假期嘅方案，但考慮到屆時好大可能要擺平各方宗教勢力，所以最終敲定由民政局負責牽頭處理。至於另一重要考慮，係勞福局未來要集中精力處理取消強積金對沖呢座大山，所以唔想再加重勞福局負擔。

馬逢國就話，唔理邊個局都好，最緊要有人孭飛，唔係繼續原地踏步，都唔知要再等幾多年先可以等到孔聖誕日「升呢」做公眾假期。