政Whats噏：陳樂行擬選天后區　撼新民黨李文龍

現屆區議會任期餘下唔夠一年時間，各黨派已展開「搶區爭霸戰」。消息指，已落戶灣仔區議員楊雪盈辦事處(楊辦)做助理、曾參與佔中嘅浸大中醫學學生陳樂行將會落場。

睇番楊辦嘅社交媒體專頁，陳樂行已多次落區派單張兼嗌咪，另有地區人士透露，近日喺天后開始見到有楊雪盈同陳嘅「孖頭」橫額。據悉楊辦內有多名學運出身人士擔任助理或社區幹事，而陳已揀定天后選區對撼新民黨現任議員李文龍。

另外，已經由民協過檔民主黨嘅莫嘉嫻，雖然紮根九龍西多年，但依家已成為民主黨九龍東支部總幹事，佢嘅老巢馬頭圍選區近日傳出交畀前公民黨成員曾健超。不過，據了解，民主動力協調名單上，呢個區早前曾有一男一女聲稱出戰，最後都無影，目前係「白區」。知情人士認為，該區變數仍然好大，曾健超未必係真命天子。莫回覆時笑指，曾有興趣認識社區人士就做個媒人，咁係咪交棒畀對方呢？佢就話「不排除」，但仍歡迎其他有心人服務社區喎。