政Whats噏:部門各自為政 離島區會爭山竹善後撥款

20181112
東網電視
更多新聞短片
離島區議會商山竹善後撥款,黃文漢質民楊善雯為何梅窩會無份。(設計圖片)
史上最勁襲港超強颱風「山竹」喺9月一吹,將香港大部分地方吹到冧晒,至今2個月都未搞掂,各區議員一直催促政府加快復修步伐。離島區議會地區建設委員會今午(12日)開會,討論民政處申撥款為山竹善後,但全部工程只涉及坪洲同南丫島,搞到梅窩鄉事委員會主席兼議員黃文漢好勞氣,質問民政事務助理專員楊善雯,點解梅窩無份喎!
根據區議會文件,有9項由離島民政事務處建造、維修同保養嘅設施被山竹破壞,包括3項喺坪洲嘅設施,及6項喺南丫島,合共涉款1770萬港元。各類工程最早可以喺本月展開,而南丫南蒲台大灣行人橋重建最遲,要等到明年7月。
黃文漢話上次會議已經講過,梅窩萬角咀村啲路爛晒,又有好多塌樹,自己更日日打1823政府熱線,又去信民政事務專員李炳威,點解今次撥款嘅項目都無包括在內?佢質疑上次開會南丫島得2個項目,點解依家變6項,係咪撥款搞梅窩就唔得,佢都唔知點樣同村民交代。
此話一出,南丫南鄉事委員會主席兼議員周玉堂即急急解畫,話之前同李炳威傾過,唔止南丫島有問題,離島好多區都未搞掂,對方先解釋會用唔同撥款復修。周斥責當局同議員溝通不足,講得唔清唔楚,變到好似議員爭資源咁,叫政府列清單講明各區工程進度由咩部門跟進。
楊善雯就澄清唔係唔做,只係用其他撥款做,應允列清單畀番議員參考。離島民政事務處高級工程督察黎明有亦幫口解釋,話萬角咀村項目會動用鄉郊小型工程撥款跟進,叫黃唔使擔心。
另外,東涌鄉事委員主席兼議員樊志平更鬧爆民政事務處,話咪以為東涌無事,只係大家太心急自己搞掂,坦言等得政府搞「我哋就死咗喇!」其實唔使咁勞氣嘅,下次再有事,可以叫發展局局長黃偉綸落區幫幫手,事關佢喺山竹後執樹表現得好落力。
不過,其實鄉郊同地區小型工程,都係民政事務總署嘅撥款負責,只要清楚話畀議員知幾時做,大家都好交代!但一個部門搞風災善後都東一忽,西一忽,民政事務總署署長謝小華真係責無旁貸,應該檢討吓,免得去其他區再搞出個大頭佛喇!