政Whats噏：網購令生意難做　李文俊叫青年返內地

外賣應用程式近年興起，香港同內地都有唔少人鍾意用嚟叫外賣，貪夠多選擇吖嘛。百仁基金會長李文俊今日(13日)喺傳媒午宴時講起，原來佢喺海南嘅酒店都有唔少客人，夜麻麻着住浴袍喺大堂等外賣，酒店餐廳嘅生意都差咗少少，不過佢都明白因為外賣應用程式，可以叫好多間餐廳嘅外賣，選擇好多，例如佢去杭州工作，同事都話要用外賣應用程式叫小龍蝦嚟食。

李文俊又話，依家網購好方便，亦令到佢嘅生意好難做，一件貨品成本係100蚊，以往可以賣150或200蚊，依家網購競爭激烈，就淨係賣到110或120蚊，利潤少咗好多，但佢覺得幾辛苦，都應該要堅持做實業。

佢又話，內地比起幾十年前已經唔同咗好多，有啲員工唔肯返香港住，寧願住喺東莞，兩三千蚊已經租到1000平方呎單位，佢鼓勵年輕人多啲返內地，感受吓內地嘅生活，先會諗到有咩新發展機會。