政Whats噏：AI搶飯碗？楊偉雄話杞人憂天

科技日新月異，人工智能(AI)愈趨成熟，連捉棋都勝過人腦，未來分分鐘可以取代部分職業，都咪話唔令人擔心。不過創新及科技局局長楊偉雄反而話唔使杞人憂天，唔通佢睇小科技嘅發展？

楊偉雄今日(13日)同一班青年大談創科，被問到AI愈見普及，甚至有人話未來會取代部分行業，青年要點樣居安思危時，楊就大派定心丸直指呢個諗法有少少杞人憂天，因為不同年代都有新工種出現，青年透過不斷學習去轉型，轉型能力愈強，面對不論AI、BI定CI都無問題喎！

佢更講到，早前有報告講自動化技術同智能科技會取代超過7000萬工種，聽見都好驚，但報告都指出隨着公司重新規劃同分工，都有過億份新工作產生，估計去到2022年已有超過5000萬個新工作崗位，會係更高增值、更好同更適合年輕人嘅工作咁話，唔知佢呢番說話能唔能夠安撫到對未來不安嘅青年呢？