政Whats噏:吳永嘉講排球 捱過首次就唔瘀

20181113
東網電視
更多新聞短片
吳永嘉係羽毛球高手,佢對排球都好有興趣。
立法會議員吳永嘉(Jimmy)係羽毛球高手,曾經打過入羽毛球青年軍,球技絕對保證,但羽毛球以外,佢對排球都相當大興趣。Jimmy話羽毛球同排球動作有九成相似,好似兩者嘅扣殺動作都係差唔多嘅姿勢,所以識打羽毛球嘅人可以好快上手打排球咁話,聽落好似幾有心得。
羽毛球等球類運動可以用球拍打波,但排球就要直接用手臂去擊球,所以打到手臂瘀痛在所難免,唔少人都因此而卻步。不過Jimmy就大寫包單,話只會第一次打排球先會搞到手臂瘀晒,佢當年都搞到手臂紫晒,只要瘀過第一次,往後無論點打唔會再瘀,就連佢多年無打排球再打都只會痛啫,仲話呢種感覺好爽喎。
仲記得Jimmy呻過無乜議員同佢打羽毛球,但排球隊人數要更多,怕且佢仲少機會可以打排球囉,但唔知聽完佢咁講,會唔會吸引到人接觸排球呢?