政Whats噏：想女兒獨立　張國鈞唔做跟得爸

早前有小學生原本打算去泰國參加數學比賽，點知去到當地就畀當地導遊介紹去學「養鬼仔」，真係嚇壞學生哥。立法會議員張國鈞(Horace)育有兩個分別讀緊幼稚園同小一嘅囡囡，佢就似乎冇有怕，話學校搞遊學團嘅指引好嚴格，加上學校通常嚟嚟去去嗰幾個地方，所以多數冇問題。問佢會唔會跟埋囡囡去？佢就耍手搖頭話唔做「跟得爸爸」，想兩個女獨立啲喎。

Horace話之前有內地碩士生想去佢嘅辦事處實習，該碩士生媽媽竟然同佢一齊面試，又試過健身時見到有男仔係喺媽媽陪同之下報名。佢同太太都唔想兩個女大個係咁，所以一直都訓練佢哋獨立啲，如果學校有搞遊學團，都放心畀佢哋自己去。

張仲話一般幾歲嘅小朋友去餐廳食飯時會同父母講自己想食乜嘢，等父母點餐，但佢同太太就會要求兩個女同侍應講，就連之前去日本旅行，都係兩個女用英文向侍應點菜。有時大人去日本旅行，喺當地餐廳點菜都可能會「雞同鴨講」，佢兩個女可以自己搞掂，認真抵讚喇！