政Whats噏：被區諾軒叫BB　葉劉笑稱：我長者嚟

立法會今早(15日)審議財經事務及庫務局動議嘅擬議決議案，以授權政府發行綠色債券。其中議員區諾軒發言話感謝議員葉劉淑儀(葉太)及幾位前議員，喺2009年審議政府推動債券基金時提出好有智慧嘅討論，講講吓仲引述「葉劉淑儀BB」嘅發言，認為政府應該喺決議案列明借錢目的。喺會議廳外，葉太就反問區：「你係咪玩我㗎？我長者嚟㗎喎！」區即刻耍手擰頭，但葉太笑話唔介意，仲同區補課講香港歷史添！

區諾軒鬧爆政府，講就話發債為咗綠色工程，但竟然喺決議案主體文內無提過話搞環保，連「綠色」都無寫，係咪想用零炭排放包裝破壞環境嘅工程。佢又引述葉太2009年發言，話如果政府目標係堂堂正正搞好債券市場，點解唔係決議案中訂明呢？過咗10年仲要重複呢個陋習？但佢突然爆肚話，「葉劉淑儀BB係咁講㗎」，令唔少人都聽到呆一呆。

事後問返葉太對於被稱為BB有咩感受？葉太質疑區諾軒係咪玩佢，坦言自己係長者嚟，又話會畀網民笑，但佢亦好大方話唔介意。佢仲話，區喺第二次發言時唔應該以殖民地政府做類比，當時港府無錢係無人會可憐，所以啲財政司都係守財奴，但近年政府使錢就無咁審慎，慨嘆要使錢好快就使晒，擔心明年少咗賣地、貿易戰等都會影響收入。不論BB定長者，葉太從政多年，點都有經驗過全議會最年輕嘅議員區諾軒，大家得閒論政交換意見咪幾好囉！