政Whats噏︰田北辰狙擊老鼠　倡絕育夠晒狠

立法會議員田北辰去年不跟從建制陣營「隊形」，反對迪士尼樂園擴建撥款引嚟爭議，而繼狙擊「米奇」後，佢最近又再出手，不過今次目標係活生生嘅過街老鼠，佢更提出要源頭滅鼠，建議研究可令老鼠絕育嘅鼠餌。

田上次狙擊「米奇」失敗，唔知係咪要發洩怒火，近日將目光放喺地區滅鼠，話8月份荃灣區鼠患指數係全港最嚴重，又話荃灣市中心有170個老鼠籠，只係每日平均捉到唔夠三隻活鼠同一隻死鼠，又話傳統鼠藥要3至7日先殺得死老鼠，嫌殺得唔夠快咁話。

田今日(15日)喺Facebook就提到各種各樣嘅滅鼠方法，例如美國用乾冰、紐西蘭設計嘅自動化滅鼠器等，但最狠嘅都係絕育鼠藥，佢仲話會逼政府盡快搵專家研究絕育鼠藥，由源頭減少老鼠繁殖添。今仗對手只有老鼠，相信田北辰唔會重蹈「米奇」失敗一役嘞。