政Whats噏:陳振英首點人數 建制議員鬧錯泛民

20181115
東網電視
更多新聞短片
陳振英忽然提出點人數,令其他建制派議員有微言。(徐家浩攝)
過去立法會拉布成風,泛民立法會議員會以點算法定人數、提出中止待續議案等形式拉布。喺今日傍晚(15日)嘅立法會會議上,金融界議員陳振英就忽然提出點人數。唔知係咪過去泛民點得太多,所以唔少議員一聽到點人數,都好理所當然以為係泛民議員要求,搞到有啲建制派喺會議廳門外埋怨。
當時立法會討論緊由兩名民主派議員提出,要求引用《立法會(權力及特權)條例》成立專責委員會調查事件。喺官員發言後,原本應該係由提出動議嘅議員發言,然後就進入投票階段,就喺嗰刻,陳振英就忽然舉手要求點算法定人數。
喺點人數期間,唔少建制派議員即刻返會議廳,不過就有部分議員有微言。民建聯梁志祥就講咗句「差嗰少少都要打鐘」,經民聯林健鋒同獨立謝偉俊就打算拖到最後一分鐘先入去,而民建聯柯創盛仲直頭鬧民主派拉布添。不過大家發現原來係陳振英嗌點人數,大家都嚇親,其中柯創盛仲質疑「點解會係佢點㗎?」
今次係陳振英首次點人數,喺會後佢就解釋,話建制派班長廖長江有叫佢幫手睇住,而當時又見到建制派唔夠人,所以先要求點人數。