政Whats噏:橫額又印錯名 邊位議員叫「國動」?

2018年11月17日 19:00
東網電視
更多新聞短片
又有橫額出錯,劉國勳變成劉國「動」(箭嘴示)。(讀者提供)

議員橫額印錯字並非新鮮事,過往都有立法會議員連自己個名都印錯,而今次就輪到立法會區議會(一)劉國勳出事,變成劉國「動」喇,而佢更話現實中真係有人咁樣叫錯佢。

呢條橫額據了解出現喺中西區,而劉國勳接受查詢時就話,自己喺全港都有橫額位,有啲會交畀地區支部使用,而佢都唔知出錯橫額嘅實際位置,相信今次只係手民之誤。

佢更話已經要求改正,本身諗過喺寫錯嘅「動」中,「重」字部分下加4點,但加咗就係錯別字,所以會要求貼上正字,費時成條橫額換過造成浪費。佢更話起初服務社區時,真係有人讀錯「國動」,不過隨着多年地區工作,同埋近年有唔少韓星個名都有「勳」字,已經好少會有人叫錯喇。

「國勳」呢個名容易令人讀錯,有時讀啱都可能係有問題,事關國勳話朋友叫佢做「阿勳」,與女仔名「阿芬」同音,所以佢會以功勳、勳章等去自我介紹,而他亦係因呢個名而起咗服務社會嘅心咁話喎。