政Whats噏︰立會足球隊怕輸　齊腳都搵外援

立法會新一個立法年度開始咗一個多月，立法會足球隊將迎來今個年度首場賽事，共有13名議員報咗名參加。雖然聽落立法會足球隊好似人多勢眾咁，不過原來都係得個殼，事關有議員就話，雖然今次有咁多議員報名，不過都係要搵外援幫手，仲話︰「唔請(外援)邊有得和」喎。

立法會足球隊將於下月8日舉行呢個立法年度首場足球賽事。雖然報名加入2018至2019年度立法會足球隊嘅只有11名議員，但參加今次賽事嘅就有13人。而未有喺上月限期前加入足球隊，但又報名參加比賽嘅就有議員尹兆堅，同埋報名時一時甩漏，後補加入嘅議員梁志祥(祥哥)。

作為立法會足球隊成員之一嘅議員陳克勤(克勤)就話，今次的確係比較多議員參加，但多數都係建制派，非建制派議員只有一向都鍾意踢波嘅醫學界議員陳沛然(Pierre)、民主黨議員尹兆堅同公民黨議員郭家麒。雖然有曾經喺比賽中為立法會足球隊入4球上演「大四喜」嘅祥哥助陣，議員球員又咁多，但克勤竟然都仲話要搵外援幫手，仲話「唔請(外援)邊有得和」，唔通真係咁怕輸？

不過，都唔完全怪得晒克勤咁講，因為立法會足球隊確係面對緊「內憂」同「外患」。先講「外患」，就係足球隊過往慣常使用嘅小西灣運動場嘅草地足球場需進行維修，所以佢哋要四圍搵場地，好似今次比賽咁，就要去到元朗大球場喇。克勤解釋話，預約足球場係「手快有、手慢冇」，真係好難，佢仲講笑，質疑立法會議員預約使用足球場可能比一般人仲難，因為負責嘅康樂及文化事務署可能會驚議員踢爛個場之後，屈番署方管理不善喎。

至於「內憂」，當然就係講緊議員問題啦，事關去到元朗咁遠嘅球場比賽，議員真係分分鐘甩底，加上今次對手係新界東醫院聯網青少年泌尿治療中心足球隊，成員可能都會有醫生，有人就質疑本身係泌尿科醫生嘅郭家麒同內科醫生嘅Pierre，唔知會唔會「鬆章」畀對手咁話。不過，郭就話當日要落區，其實都未必去到比賽，而Pierre就聲稱唔會「放水」畀對手，又話以前都同醫院管理局「波友」踢過波，人哋都好勁咁話。