政Whats噏:老鴿翻盤 傳柴文瀚移民棄選支部

20181119
東網電視
更多新聞短片
有傳柴文瀚準備移民離港,故棄選支部任何職位。
民主黨(白鴿黨)下月將會舉行兩年一度中委會改選,呢排各地區支部亦密鑼緊鼓搞改選。該黨港島區支部尋日(18日)選出新一屆部委,由現年65歲創黨元老謝志興出任主席。而剛卸任嘅南區區議員柴文瀚無再出任支部任何職位,有傳佢做埋今屆區議會後將交棒,並將移民外地。
柴文瀚自2003年起出任南區區議員,亦擔任咗6年嘅支部主席。今年換屆選舉,柴無角逐支部任何職位,反而提名謝志興接手,有傳係因為柴已經對香港無乜留戀,亦無打算放棄英國國籍,打算做完呢一屆就唔玩,準備移民離港。不過就算咁,佢都可以搵新人頂上,點解搵個創黨元老接棒,唔通白鴿黨內已後繼無人?
柴回覆查詢時話,自己做咗好耐支部主席,係時候換吓人,而未來兩年係選舉年,謝係好有經驗嘅前輩,希望可以幫到支部發展。對於係咪交棒同移民?佢無否認,只係話考慮緊,咩都有可能,不過點都做到今屆任期尾喎。