政Whats噏:平機會得C級 陳章明任內做過乜?

2018年11月19日 22:41
東網電視
更多新聞短片
即將離任的陳章明,被指在平機會毫無建樹。(設計圖片)

立法會政制事務委員會今日(19日)就消除種族歧視搞咗個公聽會,唔少團體、公眾人士及議員都提到,國家人權機構全球聯盟將香港嘅平等機會委員會工作評為C級,而且完全唔獨立,令受歧視嘅人難以求助。佢哋仲質問政府,會唔會對劣迹斑斑嘅平機會採取行動。平機會主席陳章明任期即將於明年4月到期,佢任內唔止冇乜建樹,對於平機會連年醜出國際亦無力扭轉,唔知政府幾時先至認真啲,搵到啱嘅人執執佢呢?

國家人權機構全球聯盟話,全球120個人權機關中,只有10個係被評為C級。換言之,平機會喺全球嘅排名中係最尾嗰10名!更甚嘅係,呢個評分由2000年開始至今都冇變過,即係平機會連續18年「蟬聯」榜尾。

民主黨議員林卓廷都好關注平機會嘅表現,認為平機會被評為C級係香港之恥,係長期唔合格。又話平機會成員目前係由政府委任,有礙佢嘅獨立性,而且過往處理個案極少,行政又混亂,認為政府應該將該會嘅遴選制度交畀多個民間團體組成嘅獨立委員會,令平機會可進一步獨立於政府之外,相信咁樣可以令平機會嘅運作有所改善。

香港目前現行嘅反歧視條例一共有4條,包括性別、種族、殘疾及家庭崗位嘅歧視。平機會曾經被指摘只係睇重同性婚姻、性小眾嘅議題,冇乜留意其他反歧視條例,更加唔好講跟進相關嘅改善工作。有團體就話,近年網絡、社交媒體上出現好多歧視少數族裔嘅言論,甚至有人打電話畀少數族裔嘅僱主,問佢哋點解要聘請少數族裔。2年前該團體已經向平機會反映有關問題,但平機會都只係愛莫能助,根本幫唔到少數族裔,令佢哋受歧視嘅情況日益嚴重。

一向乏善可陳嘅平機會,並未因為陳章明上任而省亮蒙塵嘅招牌,反而愈抺愈黑。佢一上任即風波不斷,包括曾指性傾向歧視立法不可取,但後來又改口話有關立法工作刻不容緩。佢又曾被指喺嶺南大學工作期間,未有申報秘撈工作,仲發信畀關注同志平權工作嘅學者,指認識其上司,被批評有恐嚇之嫌。

來到任期尾聲,外界都費事邀請陳章明出席同爭取平權有關嘅活動,好似早前立法會議員陳志全喺一個同志平權活動上,就暗批陳章明係花瓶,所以連邀請佢出席都慳番,情況罕見。難怪平機會畀人鬧毫無寸進喇!