政Whats噏︰港官死板讀稿　莫乃光叫幽默啲

香港整體競爭力被外界批評每況愈下，到底衰咗喺邊度呢？資訊科技界立法會議員莫乃光(Charles)今午(20日)喺工商事務委員會時話，其中一個敗因，係衰在港府冇幽默感。

Charles指早前參與咗一個東盟嘅論壇，香港競爭對手新加坡嘅官員喺介紹國內嘅科技政策時，自嘲科技落後，「以退為進」嘅方式令聽眾受落。另一印尼嘅官員又玩自嘲，指現時年輕人只信Facebook、Twitter，唔信政府，搞到當地官員要學習用幽默風趣嘅字眼等去玩Instagram，成功同年輕人溝通。

至於香港官員呢，就由頭到尾讀稿，有咩就淨係識唱好，Charles指駐海外經貿辦負責向外宣傳香港，但港府官員態度死板，毫無幽默感，「真係做Sales都不合格」。

商務及經濟發展局局長邱騰華回應話，宣傳香港係駐海外經貿辦嘅工作重點，尤其是推銷香港嘅稅務優勢同良好營商環境，又話立法會議員外訪，都係宣傳香港嘅重要一環，暗指議員都應該要幽默埋一份。