政Whats噏:立法會開會 梁美芬為乜大騷特區護照?

20181121
東網電視
更多新聞短片
梁美芬手持香港特區護照,詢問政府有冇正視香港人國民身份認同問題。(黃偉邦攝)
猶記得今屆立法會開始時大鬧國籍風波,而立法會議員梁美芬今日(21日)出席立法會會議時,就喺會議廳內大騷特區護照,到底搞乜鬼?
梁美芬提出有關推廣憲法同《基本法》嘅質詢,政制及內地事務局局長聶德權就話該局與民政事務局分別預留約1700萬港元及600萬港元,於2018至19年度作推廣同宣傳,又講到憲法同《基本法》共同構成特別行政區嘅憲政基礎,政府有責倡導市民全面認識,未來亦會提供機會畀青年親身體驗同實踐一國兩制,以更全面理解。
梁美芬似乎對局方回覆唔太滿意,大講聶德權所言耳熟能詳,又彈過往推廣流於表面,之後就隨手拎起本香港特區護照,話唔少人填表寫國籍做香港,久而久之產生香港國籍、修改《基本法》第一條等謬論,詢問政府有冇正視香港人國民身份認同問題,可以利用特區護照去推廣咁話。
聶德權就話有不同宣傳推廣渠道,以往宣傳片都有用類似護照方式,更指同意感情就係感情,國民身份同感情都要雙向先得,但若發現青年人有不同睇法就要嘗試了解,將憲法同《基本法》內容作客觀理性討論咁話。