政Whats噏︰郭家麒累事　立會煲底唔准設舞台

立法會議事規則委員會正研究係咪修訂《議事規則》，加入罰則處分行為不檢嘅議員，而立法會今日(21日)就收緊俗稱「煲底」嘅立法會指定示威區守則，禁止喺煲底設立舞台等臨時構築物，但就未見反對聲音。據了解，呢項新增建議係針對公民黨(公文袋)議員郭家麒早前喺煲底搭建違規舞台，而佢兩名黨友郭榮鏗同譚文豪喺行政管理委員會(行管會)討論時亦未有幫腔，睇怕佢哋都自知「豬隊友」理虧累事，所以有口難言嘞！

立法會秘書處今日發電郵通知各議員，立法會指定示威區守則新增一項「禁止使用、放置、豎設或存放任何舞台、舞台連背景幕或秘書處職員認為會構成安全危險嘅臨時構建築物」。有消息人士透露，今次行管會加例係針對郭家麒。

話說郭家麒今年4月，喺煲底舉行聲援香港大學法律系副教授戴耀廷去台灣「播獨」嘅集會，當時秘書處職員已指出活動搭建嘅舞台超過准許尺寸，但係郭拍拍心口，表明一力承擔後果，最終佢事後被行管會發警告信，但佢就繼續死撐舞台只係較規定高出0.2米，仲反鬧行管會主席梁君彥係小事化大。

據了解，行管會討論新指引當日，兩名身兼行管會成員嘅公文袋議員譚文豪同郭榮鏗，分別缺席同埋喺位唔出聲。睇怕佢哋都自知「豬隊友」理虧，所以唔願幫口辯護。

至於煲底對出嘅立法會廣場，就繼續容許設立臨時舞台，但必須要在4星期之前以書面方式通知秘書處，而舞台高度不能超過0.5米，舞台連背景幕嘅高度唔超過1.7米。

行管會成員謝偉俊話今次收緊煲底守則唔係針對示威議題，純粹係關乎示威方式，否認係針對民主派陣營。另一成員黃定光亦指煲底屬半室內範圍，搭建舞台始終有一定危險性，又話行出兩步嘅立法會廣場可以搭建符合規格嘅舞台，唔擔心新指引係收緊示威自由。