政Whats噏：不在席投錯票　建制開會三度甩轆

近來建制派同民主派似係玩緊角色對調，連一向由民主派提出點人數都改為建制派做，唔知係咪少做開「反叛」嘢，搞到連番甩轆！話說今日(21日)立法會大會期間，先有建制派班長廖長江疑似幫兄弟「補鑊」要求點算法定人數，差一分鐘多少少險流會，之後工聯會陸頌雄不在席，無得提修正案，仲有民建聯李慧琼投錯票添。

今早會議準備審議延展5項與港珠澳大橋開通有關嘅附屬法例修訂期限嘅擬議決議案時，負責動議嘅航運交通界議員易志明不在位，廖長江就提出點算法定人數，喺打鐘嗰秒，易就行入會議廳，但全部民主派不在席，最終在13分11秒先夠人。

到下晝辯論無法律約束力的「重整港鐵公司管治」議案時，有份提修正案嘅陸頌雄不在席，大會主席梁君彥拒絕處理，就算陸想反駁梁無提示亦不得要領。在投民建聯陳恒鑌提嘅修正案時，由於多名議員棄權所以被否決，但李慧琼就突然好尷尬起身，話唔好意思佢係支持修正案先係真喎。睇嚟建制派都係唔適合做壞孩子嘞！