政Whats噏：冇開會玩筆戰　邵家臻挑機羅致光

佔中案喺本周一(19日)正式開審，被告之一、社福界議員邵家臻因需上庭，未能出席多個立法會會議，但佢仍堅持同勞工及福利局局長羅致光筆戰。兩人再度隔空開火，由邵發出第一擊，就當局申請喺勞工處開位處理強積金(MPF)對沖提出四大問題。

立法會人事編制小組委員會尋日(21日)開會，審議勞福局開位建議。邵家臻因為要出庭，所以提早去信委員會主席葉劉淑儀，要求勞福局回應四大提問，包括新職位有咩策略平衡勞資意見，而唔係偏重資方；勞工處未來會點樣收集勞資雙方意見；新職位喺處理外判工上有冇角色；以及新職位如何保障工人權益。

其實羅致光上任以來，同邵家臻戰火不斷，由院舍人均面積鬥到一筆過撥款，今次竟然連MPF都唔放過，睇嚟呢對「冤家」都有排鬥，唔知羅又準備好迎戰未呢？