政Whats噏:劉吳惠蘭現身 孖前高官食壽包

2018年11月22日 20:07
東網電視
更多新聞短片
劉吳惠蘭(前左五)、單日堅(前右二)和蕭偉強(前左)一齊出席聚餐。(互聯網)

商務及經濟發展局前局長劉吳惠蘭離開官場後,都鮮有喺公眾場合露面,近日竟然喺一個聚餐見到佢喎,原來佢同懲教署前一哥單日堅、勞工及福利局前局長蕭偉強(WK)係同學嚟㗎,仲一齊食壽包添!

話說WK日前喺Facebook貼文同上載咗幾張相,踢爆咗佢哋係47屆清華大學國情班嘅同學,當年仲係由劉吳惠蘭做團長添!而喺讀完國情班之後,一班同學每年都有兩三次聚餐,WK形容成班同學都好盡興㗎!時光飛逝,今年就迎接15周年嘞,又話依家各公務員同學陸續退休,剩低兩位都會明年中食長糧。

WK仲話單日堅喺今次聚餐帶嚟驚喜,為15周年準備大壽包之餘,仲好窩心咁為每一個同學準備咗印上名字嘅小壽包,讚佢不愧係一哥喎。有網友睇到啲壽包,即刻矯正話:「電視節目教我們說不是壽包!是壽桃包。」WK就隨即反問:「乜唔係pat pat包咩?」認真搞笑。