政Whats噏：激辯同志平權　何君堯鄺俊宇駁火

同志平權嘅話題喺社會上極具爭議性，就連立法會辯論呢個議題時都火花四濺，其中建制派議員何君堯同民主黨(白鴿黨)嘅鄺俊宇，就因為「異數」呢兩個字駁火。

立法會今日(22日)辯論由首名「出櫃」議員陳志全(慢必)提出嘅「研究制訂讓同志締結伴侶關係的政策」無法律約束力議案，支持同反對雙方進行激辯。本身係基督徒嘅議員何君堯表明唔支持議案，指現有26個國家承認同志婚姻合法化，但呢啲國家都係受到毒害同處於紛亂，逆向歧視嚴重，例如有德國教師教學生「爸爸媽媽」都被指歧視同性戀，同性戀者認為應教有「爸爸爸爸」同「媽媽媽媽」，佢直言「聽到真係罵罵差差」，佢又話同性戀者「擺明係異數」，「做人有歧視冇問題」，佢亦歧視卑鄙、不仁不義嘅人，質疑支持同性婚姻係是非不分，教壞子孫。

鄺俊宇隨即反駁，指「正常唔正常」唔係由何君堯嚟定義，又不滿何君堯將同性戀者講做「異數」，「畀你打造成妖魔鬼怪，爭在未去捉邪捉鬼」，促請勿再標籤同性戀者。慢必就喺總結發言時話，讓同志締結伴侶關係亦係保障社會穩定，反問「你想我晚晚同唔同人瞓，定同鍾意嘅人一生一世？」

另一名議員謝偉俊認同有關政策需要進行諮詢，又話作為天主教徒嘅佢曾被神父提議去做神父，但「可能冇咁嘅寵幸」，最後未有做神父，佢亦曾出任平等機會委員會委員，故對同志議題持開放態度。佢又話同志議題同好多問題，包括性行為都要循序漸進，如避孕同墮胎等，社會上嘅睇法都已轉變，認為凡事「到一個位就會水到渠成」，香港現時「仲掙扎緊」。

表明支持慢必原議案嘅行政會議成員兼新民黨主席葉劉淑儀，認為議案唔違背政府立場，相信如涉及修例同婚姻制度改變，政府定會審慎行事。佢又提及華人社會婚姻制度原是「一夫多妻，有妻有妾」，非純粹為繁衍後代，又話現時很多年輕人結婚亦唔會生育，只養貓狗，直言婚姻是為繁衍後代的想法已過時，政府應聆聽年輕人聲音。

提出修正案嘅梁美芬就否認「騎劫」原議案，強調喺唔動搖現行一夫一妻婚姻制度前提下，同意讓同性伴侶享有更多權利，但現時部分人以「恐同」、「道德塔利班」等形容反對同性戀人士，佢希望政府將消除歧視範圍擴闊，包括保障反對同性戀人士。經過一輪激辯，最終原議案同修正案全軍覆沒。