政Whats噏：鄧以海曾國衞奶茶控　鄧炳強愛齋啡

香港人每朝起身都鍾意飲吓奶茶咖啡提神，原來海關關長鄧以海同入境事務處處長曾國衞都鍾意飲奶茶，佢哋今日(24日)早上出席健康快車慈善跑步行，講起健康，曾國衞笑指「最唔健康嘅嘢我齊晒」，包括習慣起身唔食早餐就飲奶茶，至於鄧以海就話，好多人都知佢係「奶茶狂」。

曾國衞話，平時瞓得唔多，只係瞓5小時左右，所以即使以前編更返唔同時間都瞓得着，而自己由細到大都唔食早餐，因為細嗰時，爸爸媽媽要工作，所以冇人煮早餐畀佢食，自己都唔會煮個麵。至於運動方面，依家每星期去健身室3小時，包括其中1小時用跑步機跑步。難怪睇落佢都相當健康啦！

鄧以海就話，冇熱奶茶就諗唔到嘢，做重要決定前都鍾意飲杯熱奶茶，後生為咗日以繼夜咁做嘢，一日可能飲3、4杯，近年就開始飲少咗好多，一日可能飲1杯，甚至半杯，始終飲得太多都唔係咁健康。佢今日參與步行時話，諗起以前入學堂訓練都有跑大欖涌嗰邊，第一次跑都喘氣，半年後差唔多出班，跑上山來回多一轉都冇問題。

今日履新的警務處副處長(行動)鄧炳強就話，自己怕肥，有時會飲吓齋啡，依家7點返工，放工就晚上6、7點，但鍾意份工，時間就過得好快。講起今次活動，搞手之一、清水灣鄉村俱樂部副主席王桂壎話，今次有約2600人參與，以往試過太多人參加，第一批跑完，最後一批都未出發，所以今年延長咗少少賽程，而清水灣有咁靚嘅風景，亦預留咗一個地方畀大家跑完可以影吓相咁話。