政Whats噏：橫洲小組變雞肋　主席位冇人吼

元朗橫洲公屋發展項目鬧出嘅風波幾近煙消雲散，早前立法會針對事件成立嘅跟進橫洲發展項目事宜小組委員會(橫洲小組)亦頓變建制派眼中嘅雞肋，皆因橫洲小組對項目冇實質影響，亦難以吸引社會聚焦，可以話係「食之無味棄之可惜」。但由於建制派必須喺小組「勒住」靠橫洲風波「彈起」嘅民主派立法會議員朱凱廸，故預料建制派嘅議員麥美娟(Alice)同柯創盛(柯仔)都要硬啃「雞肋」，續任小組嘅正、副主席。

橫洲小組下周五(30日)將召開本立法年度首次會議，並選出正、副主席。呢個小組源自橫洲風波，而橫洲風波早於2016年9月立法會換屆選舉時爆出，但係喺立法會房屋事務委員會轄下成立嘅呢個橫洲小組，就拖拉到今年2月底先正式開會，當時已經被指過晒氣，但係建制派為免朱凱廸搶到小組主席一職後搞搞震，最終都動員咗建制派加入小組，令小組規模有成24人，並由Alice同柯仔夾擊得手，包攬正、副主席之位。

不過呢兩年政壇風起雲湧，橫洲風波早已淡出公眾同媒體嘅焦點。有建制中人指，橫洲公屋項目早已喺立法會房屋事務委員會通過，下一個戰場理應係立法會財務委員會轄下嘅工務小組委員會，之後再到財委會，反觀橫洲小組「收視率」低，兼且實質作用欠奉，正、副主席「坐又冇着數，唔坐又唔得」，真係如同雞肋咁難啃。

據悉，建制派內部並冇人出聲想接任橫洲小組正、副主席，因此Alice同柯仔將會續任。建制中人指小組已開過兩次會，但冇乜實質作用︰「最有用已經係實地視察」，認為應考慮「摺埋」呢個小組。

Alice同柯仔回覆查詢時同樣承認，未聽聞有建制派盟友想接任橫洲小組嘅正、副主席位，假如冇人想接棒，就會繼續做落去。至於民主派方面，朱凱廸就話仍然考慮緊選唔選橫洲小組主席，而同屬民主派陣營嘅小組成員尹兆堅就認為，房屋事務委員會通過咗嘅只係橫洲公屋第一期項目，但政府口口聲聲話將會發展嘅第二、三期仍然係充滿疑問，認為小組應繼續開會要求官員交代。

民主派仍然咬住過晒氣嘅橫洲事件唔放，建制派喺唔可以讓步下，睇怕Alice同柯仔都係要「罰坐」多一段時間喇。