政Whats噏:做「焚化爐」累事 徐英偉周身病痛

2018年11月25日 22:15
東網電視
更多新聞短片
徐英偉睇落都算幾Fit,但原來尿酸同膽固醇都超標。(溫國佳攝)

好多人睇落健健康康,原來都周身病痛。好似勞工及福利局副局長徐英偉(Caspar)原來尿酸同膽固醇都超標,而尿酸更加已超標十幾年,成因係以前做商界食得海鮮多,仲試過痛到半夜拐住叫的士去醫院打針止痛,依家間中都會痛得好緊要,所以長期要戒口,一年只可以食一次海鮮,屋企亦常備止痛藥。

佢聽講尿酸高要飲青木瓜茶,所以太太都會煲畀佢飲,仲會飲椰青水添,但就唔肯食膽固醇藥,因為一食就要食成世。講開木瓜,佢話以前做銀行,成日去樓下買木瓜奶,好鍾意飲,仲要加碼,貪佢營養好喎,當時個個同事都知佢係「焚化爐」,食飯一定包底食晒所有嘢,但點食都唔肥。

依家就冇呢支歌仔唱嘞!佢話最近驗身,醫生叫佢減25磅,估計致肥原因可能係因為一日飲兩罐可樂,但佢冇計劃要減肥喎,打算照食快餐店。