政Whats噏：陸頌雄修正案衰英文　梁君彥拒批

立法會議員可以就政府議案同議員議案提出修正案，不過一定唔可以違反《議事規則》，而過往更有修正案將原議案改頭換面嘅情況出現。不過，後日(28日)立法會會議審議嘅《旅遊業條例草案》，議員陸頌雄提出5項修正案就有2項被拒，死因仲要同英文有關，乜咁失察呀？

《旅遊業條例草案》周三就會恢復二讀辯論，立法會主席梁君彥今日(26日)對相關嘅修正案作出裁決，就住陸頌雄所提出嘅5項修正案，只批准提出3項，其餘2項都裁定違反《議事規則》。

其中1項修正案係要求旅行社幫領隊買保險，旅遊界反對，但保險界就支持，原本係分開投票，依家被退回就唔使煩喇！梁君彥裁決前有邀請政府畀意見，政府認為可以透過行政措施訂立，故修正案並無必要。再者該修正案嘅英文版本不合語法，所以梁君彥最後唔批准提出。至於陸頌雄所提嘅另一項修正案就涉及旅遊業監管局嘅組成，當中嘅中、英文版本並不一致，語意並唔明確，會令到2個文本出現相互牴觸或意義差歧，而且政府認為現時安排已經夠均衡代表性，所以唔支持修正。

睇番呢2項修正案，被批為不合語法嘅係陸頌雄將「to accompany」寫錯為「to accompanies」，陸頌雄之後都有回信解釋話只屬手民之誤，仲話唔會引致錯誤解讀呢條條文喎。不過，梁君彥就認為，準確性對法律草擬至為重要，而且不合語法係違反咗《議事規則》，所以退番呢項修正案。

至於另一項修正案，陸頌雄嘅中文文本係「不少於六名旅行代理商的代表及六名導遊或領隊的代表」，但英文就寫「not less than 6 representatives who work as tourist guides or tour　escorts」，即係中文講明至少要有6名導遊或領隊代表，但英文就不多於6名囉！

陸頌雄亦有就呢項修正案喺信中解釋，話中文版本用上連接詞「及」，令到開首嘅「不少於」包括埋導遊或領隊嘅代表，所以同英文版無牴觸，更講到呢幾項修正案都係為改善旅遊業從業員權益，希望可以獲批。但係梁君彥最後都裁定違反《議事規則》，原因係中英文文本有牴觸，並未有理會政府其他反對理由。

陸頌雄回應東網時話，今次做得唔夠周全要承擔責任，亦要向業界致歉，好彩最關鍵有關僱傭關係嘅修正案無受影響。佢形容今次係純技術錯誤，希望立法會未來可以研究會否預早提醒類似嘅技術問題，畀議員有時間修改喇。