政Whats噏：陳凱欣議會首協議　畀咗鄭松泰

候任立法會議員陳凱欣將於明天(28日)宣誓就任，不過佢已率先與其他立法會議員有互動合作協議，對象竟然唔係選舉時為佢站台嘅建制派，而係熱血公民鄭松泰！

陳凱欣今早(27日)就綵排宣誓時透露，座位同辦公室仍未有定案，綵排時就坐住青年新政梁頌恆嘅原位，左側為鄭松泰。陳凱欣已經同鄭松泰取得共識會互換位置，令到陳凱欣可以坐喺鄭松泰同馬逢國之間，前面則為議員謝偉銓，使呢位議會新丁可以同建制派有所照應。

至於用於召開財務委員會、內務委員會等會議嘅會議室一，陳凱欣就要與建制派分開，與泛民陣營只有一條走廊之隔，鄰座則為人民力量陳志全。不過前面仲有議員鄭泳舜同謝偉銓，所以都唔算孤單。

辦公室方面，據聞陳凱欣屬意618室，與鄭泳舜為鄰，但由於立法會秘書處正使用緊618室，需要約半個月時間清場，呢段時間陳凱欣會用住1019室，上手用家就係社民連梁國雄，預料聖誕節就可以返回建制陣地。