政Whats噏：入熱廚房有代價　高永文開戶口遭審查

政府「熱廚房」火熱難耐，食物及衞生局前局長高永文今日(27日)出席浸會大學一個講座，就以官場過來人嘅經驗，感慨話做問責官員其實要冒好大風險，譬如傳媒會好留意官員居所有冇僭建，事後亦有啲人話，「早知就唔去做啦」，佢仲話要付出代價㗎！

佢話做問責官員要付出時間、家庭生活同種種意想唔到嘅代價，雖然佢離開咗熱廚房一段唔短嘅時間，但去銀行開戶口也遭到嚴格審查，就連家人亦不能倖免，就算已過咗「冷河期」，到依家去台灣都好困難，甚至仍去唔到。

講到做人道理，佢坦言自己唔係完美嘅人，有好多瑕疵，但無論係官場內外，佢一旦承諾做某件事嘅話，必定全力以赴，如果盡咗力都畀人話hea做，自己就會好唔開心。佢又寄語年輕人，要明白世上有好多事情，唔係話努力就一定做得到，例如佢係最早發起醫學界行毅行者，但咁多年來，佢一日內最多只行到三十公里，根本無法應付一百公里嘅挑戰，所以與其要達成硬指標，不如盡力而為就已經心安理得嘞！