政Whats噏:張宇人阻建回收中心成功 黃錦星頭痕

2018年11月28日 09:21
東網電視
更多新聞短片
政府搞環保政策搞到一鑊粥,張宇人等要向政府示威。(設計圖片)

立法會工務小組委員會今早(28日)開會,討論政府喺北區沙嶺興建有機資源回收中心第二期嘅建議,有關工程涉款24.53億港元。過往民主派議員動輒拉布阻撓政府撥款申請,點知今次就輪到建制派嘅飲食界議員張宇人。佢喺會議一開波就鬧爆政府書面回答議員問題太遲,佢問嘅問題更加冇答,建制派及民主派議員亦都附和。張宇人更嬲到提出中止議程,最後喺民主派支持同建制派大部分議員不在席之下獲得通過。建制派中人更爆料,話政府環保政策一鑊粥,今次都係畀政府一個警號,睇嚟環境局局長黃錦星都有排頭痕喇!

建築界議員謝偉銓喺會議上率先向政府開炮,直言雖支持回收中心二期工程,但希望政府書面回應議員問題時「早少少」,認為政府對有關議題應早有準備,但喺尋日(27日)下午5時半先回覆議員,議員「要消化都困難」。張宇人隨即批評政府做法係「不能接受」,佢早前曾問政府有關內地回收廠嘅情況,當局亦未有回覆,仲反諷叫政府不如隔兩個星期後再傾添!

張宇人之後亦多次向在席嘅環境局副局長謝展寰提問,似乎都唔多滿意政府答案,仲話︰「我眼又矇,耳又聾,你講慢少少,吟吟沉沉我聽唔到。」由於佢已提問咗十多次,小組主席盧偉國提出要就議員提問「劃線」,佢當然反對。盧就要求佢勿再喧嘩,佢反駁︰「掟我走吖!」佢其後更動議中止議程,直斥工程費用昂貴,政府有錢都唔應該將公帑掉落鹹水海。

今次可能係張宇人動議中止議程嘅「處男作」,雖然佢事前已特登行去民主派議員席前「請教」,但都一度講錯動議中止嘅條文,需作出更正。而動議喺佢加埋黨友航運交通界議員易志明同民主派支持下,以12票贊成,4票反對獲通過,真係贏下拉布第一仗。

值得一提嘅係,表決中止動議時大部分建制派都冇投票,當中仲有人明知要投票都離開會議室。有建制派議員話呢鋪佢哋都撐張宇人,加上政府強推「四電一腦」計劃已搞到一鑊粥,最近又再提出垃圾徵費建議,市民都鬧爆政府,如政府唔作出改動,作為建制派都難以再支持垃圾徵費建議喇,而回收中心二期工程並唔緊急,所以要畀啲顏色政府睇下咁話。仲有人透露,話環境局事前完全冇拉票,諗住坐定粒六,就算開會先嚟拉票,都會投反對票。

過咗中止動議之後,張宇人好開心咁喺前廳請議員食蛋糕,又話朝早11點有人同佢講:「我哋離席,你就要請食飯。」佢反問請食蛋糕得唔得?咁通過咗,佢就兌現承諾請食蛋糕,跟住仲叫民主黨議員黃碧雲食,話多謝民主黨支持佢個中止動議。佢哋就「慶功」,睇怕黃錦星就好頭痕,要攝高枕頭諗下點拆彈喇!