政Whats噏：立會餐廳周六起停膠飲管　明年全走塑

塑膠對環境破壞有幾大，相信都唔使多講。立法會秘書處今日(28日)通知，立法會餐廳都打算「走塑」，由本周六(12月1日)開始唔再供應塑膠飲管，明年開始仲會全面「走塑」，即棄塑膠餐具通通停止供應，聽聞就連立法會5樓議員咖啡角都會「走塑」。

立法會餐廳為咗配合秘書處推行「停用即棄塑膠餐具」環保工作，即將開始「走塑」，但會按個別顧客要求提供紙飲管，有關費用就「用者自付」，至於餐具方面，「走塑」後就會免費提供木製筷子同木棒，顧客亦可以向餐廳購買木製嘅叉、餐刀同匙羹。

講真嗰句，議員喺立法會都有間房，放多套餐具並非難事，如果第日買飯，連木筷子都唔攞，咁就更環保嘞！