政Whats噏：柯創盛追問疫苗　副局長已讀不回？

有四價流感疫苗含白色懸浮物，其中有7.5萬劑懷疑已注射，唔少地區人士過去都有舉辦流感疫苗注射活動，所以非常關注事態發展。不過議員緊張唔代表政府一樣，好似立法會議員柯創盛(柯仔)向相關官員查詢時就隔咗一日都無回應，到底邊個官員咁大膽呢？

柯仔就話尋晚(27日)已經WhatsApp聯絡食物及衞生局副局長徐德義，想了解流感疫苗問題，因為地區兄弟一見到有關新聞都好慌張，而且自己上星期先喺立法會接種疫苗，點知全日都未獲回覆，大嘆對方係咪嫌佢煩，將佢Block(封鎖)咗！

柯更透露，以往搵徐德義都唔係成日獲對方回應，但現代人都已經善用科技利用WhatsApp幫手，尤其對呢類緊急議題。佢認為就算對方仲未有答案，都可以簡單覆句「收到」或者用OK手勢，大嘆現時只有單向溝通囉。不過，柯仔都讚有啲副局長回覆迅速，好似政制及內地事務局副局長陳帥夫、保安局副局長區志光、勞工及福利局副局長徐英偉等。

入夜後柯仔向東網表示，徐終於喺黃昏時分回覆咗佢，並且為無「應機」致歉，亦確認咗上周喺立法會所接種嘅疫苗，並非今次受影響嘅批次。