政Whats噏:帳委會查唔查港台?建制泛民掀角力戰 

20181129
東網電視
更多新聞短片
審計署報告再度批評港台,並列出多宗罪。
審計署尋日(28日)發表新一份報告,力數香港電台多宗罪,又斥責食物安全中心辦事不力,亦揭示警方重複採購等。立法會政府帳目委員會(PAC)今朝(29日)開會研究,就邊幾個項目召開聆訊,據了解,涉及食安嘅兩大章節就勢必跟進,更係愈快愈好,而涉及港台同警方的問題,就成為建制同民主派嘅角力場,雙方為調查邊個章節爭持不下,所以下月頭會再開會商討。
今朝會後,PAC主席石禮謙扑咪時就話,委員會會就食安中心兩個章節召開聆訊,食安管理就由副主席梁繼昌(Kenneth)負責、進口管制就由委員邵家輝同何俊賢負責,至於餘下8個章節會調查邊啲,就留待下月6日開會決定。
不過,有知情人士透露,其實PAC就今次嘅調查項目有分歧,建制派就希望跟進港台問題,而泛民則關注警方使錢問題。有委員表示,PAC慣例喺上年度會處理多啲項目,但基於舊年好多大章節要搞好耐,搞到要出A、B、C份調查報告,今年大家似想做得集中啲,所以估計今次只會跟進大約3個章節,換言之港台同警方兩章節要二揀一。
然而今次係相隔12年後,審計署再度審查港台,數出多宗罪包括電視營運表現不濟、收視收聽率奇低、不停重播「炒冷飯」、高製作費低生產力、網頁無人睇、合約人手超多、外購單一化等。話晒港台都係公營機構,年耗幾十億港元公帑,節目悶得嚟又無人睇,認真需要立法會去睇吓入面有乜問題。
PAC有7名委員,建制與泛民四三比,如果照數票查港台機會大,不過由於主席慣性未必有得投,兩派三三比下,可能仲有排拗。不過咁,有委員講明調查數目無上限,只係睇委員工作有幾快同勤力,或者拗唔掂數變查4個都唔定,即管睇吓兩派如何角力。