政Whats噏：工務小組提早加會　人工島大橋爭拗多

今個立法年度開局近2個月，政府就急不及待想加快立法會效率，率先去信工務小組委員會主席盧偉國，話預計會有多個項目要審議，希望可以加會。翻查文件，政府打算喺明年夏季休會前提交84個工程項目，包括中部水域人工島相關研究、元朗橫洲公營房屋發展計劃的工地平整及基礎設施工程，及港珠澳大橋主橋追加20多幾億元撥款等。咁多具爭議項目上場，睇嚟政府都係怕拉布有排玩，急急加會補定底先嘞！

話說盧偉國早前已按慣例，喺下月初召開一個特別會議，等政府官員可以向議員介紹本年度會遞交審議嘅工程項目。根據文件，84個項目當中，預料明年首季或第二季諮詢事務委員會嘅「中部水域人工島相關研究」最為爭議。呢個項目係由發展局工務科負責，擬議嘅工程係計劃喺港島同大嶼山間，具潛力嘅中部水域人工島做研究，內容就包括交椅洲人工島嘅詳細土地用途規劃、工程研究、環境影響評估、策略性道路連接的可行性及基建設施研究等，申請五億元以上嘅撥款。

驟眼睇唔知仲以為係極具爭議性嘅「明日大嶼」前期撥款申請，不過文件點出項目係上屆遺物，2014年時喺工務小組經6日審議後，政府決定撤回，至今年再擺返入議程內。政府消息人士都極力否認同「明日大嶼」有關，仲話當局會另外就「明日大嶼」申請另一筆款項進行研究，到時會列明詳情。

此外，喺上月底開通嘅港珠澳大橋亦要申請追加撥款，文件話自2009年施工以嚟受到唔同因素影響，成本不停加搞到有超支，香港要額外揼水20多億元。當局今次似係極有自知之明，預料項目有排玩，提早要求加會搞掂啲簡單項目先，盧偉國去信委員，建議喺明年1月7日、1月21日同2月13日，加開每節兩小時會議。

雖然立法會自修改《議事規則》後，甚少有大型拉布出現，但仲記得以前日拉夜拉、日審夜審嘅日子，呢兩項咁有爭議性嘅項目實拗到出牙血都未傾掂。喺社會對填海立場兩極化時，發展局局長黃偉綸突然勇闖立法會攞錢研究人工島，相信呢次勢成明日大嶼申請前期撥款嘅前哨戰，而運輸及房屋局局長陳帆亦唔會好得幾多，大橋自開通後搞到東涌立立亂，睇嚟兩人有排受氣，實畀議員追住質詢，將來更可能要再度加會嘞！