政Whats噏：卿姐戴LSE博士帽　亞洲女性第一

前立法會議員劉慧卿喺香港政壇無人不識，佢讀碩士嘅母校倫敦政治經濟學院(LSE)近日來信，話將向佢頒授名譽理學(社會科學)博士學位，料將成為香港、乃至亞洲第一位獲頒呢個學位嘅女性。

劉慧卿尋晚(28日)收到嚟自LSE校長嘅來信，指下年7月向佢頒發有關名譽學位，信中更指出呢個名譽學位只頒授予喺某個領域有突出同卓越成就，實踐學院使命並改善社會嘅人物。學院又指，屆時會喺倫敦舉行頒授儀式，設晚宴祝賀得主。

劉慧卿話，對獲頒學位感到榮幸，認為學院係對佢過去爭取民主自由同人權工作嘅肯定。