政Whats噏：首當主席　鄺俊宇「多謝自己」

立法會議員一般喺會上發言時，都會以「主席」開首，喺發言完畢亦會以「多謝主席」作結尾。作為新任嘅福利事務委員會主席嘅鄺俊宇(Roy)，喺傳媒茶敍時自爆，話習慣咗喺會議上發言完畢都會講「多謝主席」，搞到主持會議時都改唔到口，喺講完之後隨即發現有問題，即時加番句「多謝我自己」。

依家立法會廣播系統有埋手語即時傳譯，阿Roy話事後大樓遇到傳譯員，對方都記得佢，仲同佢講有譯埋「多謝我自己」嗰句。雖然佢喺2007年已經做區議員，但係咁多年嚟都未試過做主席，所以難免會有啲蝦碌。

話說明年就係區議會換屆選舉，身為立法會區議會(第二)功能界別議員嘅阿Roy都唔敢偷懶，近日唔止自製工作報告，仲落埋區派單張。佢透露，依家一星期起碼設兩個街站。至於反應如何？佢話唔少街坊都對單張有興趣，一個半鐘頭可以派到1000張，有時仲會有街坊排隊拎。