政Whats噏：蔣麗芸自稱有心有力　寸後輩負累多

立法會九龍西次輪補選塵埃落定，由建制派代表贏得議席，令現時九龍西6個直選議席中，建制派佔咗4席，可以預見2020年立法會換屆選舉，建制派有人滿之患，早前已傳今屆連任九龍西嘅議員蔣麗芸(Ann)或會被勸退。對於呢個傳聞，Ann就認為做議員最緊要係有人支持，有心有力，仲話相比起啲後生嘅，佢就冇乜負累，面對錯嘅嘢都夠膽出聲批評，即係暗寸啲後生議員做「鵪鶉」唔敢出聲。

繼今年3月立法會九龍西首輪補選，與Ann同屬民建聯(民記)嘅深水埗區議員鄭泳舜當選後，上月嘅九龍西次輪補選，代表建制派出戰嘅食物及衞生局前局長政治助理陳凱欣亦勝出，令建制派喺該區嘅立法會議員增至4人，包括Ann、鄭、陳同梁美芬。政界預計2020年立法會換屆選舉，建制各黨派爭出選肯定打崩頭。

陳當選之後，到底會加入政黨，定係繼續保持「獨身」，暫時仲未有定案。不過，民記高層公開明言大門為佢而開，佢加入民記一旦成事，該黨喺九龍西就有3個議席，換屆選舉時必定會有人被勸退，而年紀較大、已任兩屆議員嘅Ann可以話係首當其衝。

面對被勸退嘅傳聞，年過60、換屆選舉時攞得長者卡嘅Ann就話，首先民記要爭取喺換屆選舉時可以出到2名候選人，即爭取保留現有2席，又叫大家唔好「年齡歧視」，佢舉例話，有政界人士都係年過60歲先至從政，最後做到90幾歲，所以最重要係有人支持、有心去做事，同埋仲有咁嘅精力，即暗示自己有心有力，叫啲後生唔好歧視佢年紀大。

的確俗語有話「薑愈老愈辣」，相信Ann可能都好認同，事關佢被問到會唔會覺得自己有經驗過啲後生議員，會比較優勝時，佢就話「後生嗰啲可能有負累」，但佢就冇喇，所以佢見到有錯嘅就會出聲鬧，唔使賣人帳咁話。的而且確，Ann在議會又真係比較敢言，不時向官員同民主派議員開火，到底有人支持、有心有力、敢言，能否成為連任優勢，就要拭目以待喇。