政Whats噏：胡志偉連任白鴿黨主席　不信任票倍增　

近來鬧出唔少內鬥風波嘅民主黨(白鴿黨)，今日(2日)舉行咗新一屆換屆選舉，主席胡志偉喺冇競爭對手嘅情況下，以189張信任票、58張不信任票成功冧莊。翻查以前嘅數據，胡志偉喺上屆選舉中所得嘅不信任同棄權票只有23張，今屆就增加咗1.5倍。雖然話係成功連任，但係不信任票倍增，唔知同近排一連串嘅風波有冇關係？

今日仲選出2位副主席，包括爭取連任嘅羅健熙同埋翻兜副主席一職嘅立法會議員尹兆堅。羅健熙嘅不信任票仲多過胡志偉，有成66張，信任票方面就有174張。至於尹兆堅所得嘅不信任票只得3張，信任票係3人中最高，有243張。

中央委員選舉方面，由於毫無競爭，所以名單上嘅27人都獲得足夠信任票當選。不過據悉今次選舉中亦有出現唔少不信任票，其中有份捲入該黨新東支部選舉風波嘅立法會議員林卓廷、社區主任莊榮輝同冼卓嵐，都有逾80張不信任票，而冼更加有91張添。

另一方面，雖然唔少元老都退下火線冇再參選，但係都仲有張賢登、蔡耀昌、李永達同埋單仲偕等老鴿參選，除咗單仲偕之外，其餘3人嘅不信任票都有超過70張，顯示對黨內嘅老人政治不滿。

今次選舉另一個焦點，就係前主席劉慧卿(卿姐)復出參選紀律委員會成員，同其他8名候選人一齊角逐7個席位。結果老鴿陳樹英同埋爭取連任嘅李偉峰最終落選，卿姐雖然成功當選，不過只取得153票，得票率約67%，排尾2。至於以最低票數當選嘅係沙田區議員鄭則文，比卿姐少1票。

對於今次有咁多不信任票，胡志偉就話冇辦法去區分信任票嘅根源，未來會走訪18區，細心聆聽黨友嘅意見，釋除佢哋嘅疑慮，希望以最大嘅誠意，同埋以大公無私嘅方式解開矛盾。政圈流傳有唔少人會退出白鴿黨，胡就話至今都未收到退黨申請，如有此事會尊重黨友嘅決定。

近年白鴿黨黨員凋零、青黃不接，黨內新一批領導層仲要被投咁多不信任票，睇嚟胡志偉要認真諗吓點樣執生喇！