政Whats噏：佗B五月報託兒　容海恩向勞福局開火

開講有話「子非魚，焉知魚之樂？」立法會議員容海恩(Eunice)自懷孕以來，對媽媽權益愈來愈關注，似係針拮到肉真係覺得痛。Eunice近來慨嘆做媽媽遇到好多問題，佢早喺懷孕5個月已報名排政府嘅資助託兒班，估計要到BB出世9個月大先有位，炮轟政府學額唔夠、資助唔夠、宣傳唔夠，幫唔到雙職父母，如果勞福局搞唔掂，就向司長追，再唔得就向特首追，總之要有人處理喎。

Eunice自今年8月結婚後，好耐無同老公袁彌昌「合體」出巡，尋日(1日)兩人就出席一個支持媽媽創業嘅活動。問到係咪老公想暗示無限量支持繼續工作？Eunice笑稱，梗係要喇，同埋個活動係袁彌昌小學同學搞，咪去支持吓囉。佢仲話，初步傾咗同老公分工湊BB，但亦一早報咗託兒班，希望快啲有位。

點知講到託兒班Eunice就好勞氣，話政府宣傳唔夠，其實依家託兒班已經好多嘢學，唔係放BB喺度瞓就算，價錢仲唔平，政府資助後都要成5000多港元一個月。佢直言，雙職父母需要好多支援，政府託兒班做到朝八晚六，甚至晚七，對好多父母嚟講好重要，呢排已經日鬧夜鬧勞福局，希望可以做更多。