網民熱話：公屋之日常？　晾衫架驚現湯汁垃圾包　

高空擲物影響環境衞生亦危害途人，但依家有缺德者置若罔聞。有網民於社交平台上載一張照片，照片中有公屋住戶竟將一袋滿載食物殘渣的垃圾包拋出街外，而且剛好跌在低層單位晾衫架上。事件引起不少公屋居民共鳴，更大鬧拋垃圾者「黐線」。

該公屋位於觀塘彩盈邨盈康樓，網友Emily Lo昨日（2日）於「巴打絲打 Facebook Club」專頁上載其單位外晾衫架照片，相中可見一袋載滿食物殘渣的垃圾包，擱在晾衫架上，相信是從上層單位擲下，垃圾包內滿載疑似湯汁及食物廚餘，令人惡心。發文者對事件表現無奈，留言稱：「依家已經唔敢再掛衫出去曬。」更怒斥擲物者，「你屋企冇垃圾桶㗎？」

Emily向東網表示，類似事件經常發生，「已經唔係第一次，大多數係廚餘」。她指事後將垃圾收入屋，其中一袋不幸跌落樓，她已即時通知管理處，亦有區議員見到她的發文，找她了解事件，並會詳細檢討加裝閉路電視的位置。不過事件剛公開，事件又有新發展，今日(3日)樓上再扔下一個裝有魚骨的垃圾袋。「叫埋(房署)主任上嚟影相同清潔，一開窗成陣臭味，條繩都滿菜汁」。Emily表示已向房署要求拆下晾衫架繩索，避免再有類似事件發生。

事件令不少身為公屋居民的網民感同身受，大鬧拋垃圾者「黐線」及缺德。「仲要有湯汁，好心叫佢倒咗先啦，倒垃圾都唔識，仲要倒落人哋樓下，屋企唔使要垃圾桶同廚房啦！」亦有人分享同類經驗：「住得公屋就預咗」、「你成包(垃圾)咪好囉！我樓上粥粉麵飯係碎上」、「我屋企接過雞頭雞頸同煙頭，自此無再晾過衫出去。」有網民更擔心將來實施垃圾徵費，「咪日日夜夜都扔落街」。

根據房委會「屋邨管理扣分制」規定，「高空拋擲破壞環境衞生的物件」，可立即扣7分，如「可造成危險或人身傷害的物件」，租戶會即時扣15分，房委會亦會引用《房屋條例》發出遷出通知書，終止其租約。而住戶在2年內被扣除的分數累計達16分，其租約/暫准證將被終止。

該邨物業服務辦事處回覆東網查詢時表示，近日接獲住戶反映有高空擲物的情況，已加派保安員巡視懷疑高空擲物的地點，並向附近住戶查詢有否目睹事發經過，亦已張貼通告，呼籲住戶切勿高空擲物。辦事處已安排偵查屋邨高空擲物特遣隊到邨內執行巡查工作，亦已安排調配一組便攜式監察高空擲物系統往彩盈邨使用。

網民有話說：

Man Lam：裝個cam都好，捉到佢3次走得

Donald Yeung：畀間公屋佢住，仲唔識自愛

Tsz Lung Lai：「公德心」三個字已經冇咩人識點解

Albee Li：嘩咁黐線、細個嗰陣啲人最多晾衫唔扭乾，滴水咋喎

Huang Jia Yin：好黐線依家啲住客、我都係受害者

※緊貼網民熱話，掌握最熱話題，請關注網民熱話fb：