政Whats噏:喜遇球王施丹 顏汶羽以為眼花

20181203
東網電視
更多新聞短片
顏汶羽(左二)喜遇偶像施丹(右二),興奮一齊合照。(顏汶羽fb)
法國球王施丹旋風式訪港,唔少網民都分享「野生捕獲」呢位足球傳奇嘅報告,青年民建聯主席顏汶羽(Frankie)今日(3日)亦成為幸運兒,作為足球迷嘅佢更笑言見到球王真人一刻,以為自己發夢眼花,再三問身邊同事確認無睇錯,先識衝上去要求合照。
Frankie回覆查詢時話,自施丹喺1998年世界盃帶領法國擊敗足球王國巴西,他便開始留意佢,施丹轉身、喺球會皇馬同其他球星合組銀河艦隊,以及佢最後一屆世界盃喺決賽用「鐵頭功」頭頂對方球員心口等都記憶猶新,因此當佢今日喺尖東偶遇呢位兒時偶像時,一度開心到以為眼花。
Frankie又話,施丹嘅性格同預料中一樣含蓄,影相過程中面帶笑容但一言不發,而佢認為對方身形比較想像中單薄,「足球員嚟講覺得佢單薄咗啲,不過佢係技術型球員,唔使同人撞嘅」,完全係一副小球迷嘅心情。Frankie將合照放上網「呃Like」,引嚟唔少人「葡萄」妒忌,好似工聯會鄧家彪就猛讚Cool,陸頌雄亦指施丹擔任進攻中場充滿藝術感,認為對方係真球王咁話。