政Whats噏：砌積木？謝偉銓倡公屋天台加單位

香港房屋問題可以話沒有最嚴峻，只有更嚴峻，建築、測量、都市規劃及園境界立法會議員謝偉銓(Tony)今日(3日)同運輸及房屋局副局長蘇偉文及房屋署代表會面時獻計，指可以喺部分公共屋邨嘅天台同樓層加建預製組合屋，即係好似砌積木咁，喺現有公屋增加單位數量。

Tony話佢嘅團隊以沙田禾輋邨為例，指喺天台用預製組件可砌出39間組合屋，另現有每層又可以加4個組合屋單位，10層就足足多40個單位咁話。單位規劃要過重重關卡，Tony承認政府已提出包括承重能力、消防同水電煤供應等問題，而佢有信心可以克服喎。Tony仲話，政府已就此建議研究咗全港七成公共屋邨係咪可行，但就承認政府仲未有試行時間表。