政Whats噏：陳健波同邊位前議員冇偈傾？

立法會議員有成60幾個，雖然分晒建制同民主兩派，不過大家同事之間朝見口晚見面，點唔妥極都會打個招呼嘅。之不過，身為立法會財務委員會主席嘅陳健波(波哥)，出席網台節目時就自爆，話同好多議員都有偈傾，包括一啲激進派，但唯獨一名姓陳嘅前議員就冇偈傾，仲話見到面都唔會打招呼，到底波哥同邊個有咁大牙齒印呢？

波哥喺節目中起初都唔肯透露對方係邊個，喺節目主持人、前民主黨主席劉慧卿(卿姐)嘅追問下，先透露對方姓陳，但唔係現任立法會議員陳志全。波哥就話早期都仲同對方有偈傾，但後來覺得佢好過分、不知所謂，所以就冇再聯絡喇。波哥仲話人係要有底線，有底線先會互相尊重，似乎係暗示對方冇底線。卿姐聽完隨即再追問嗰個人係咪前立法會議員陳偉業(大舊)，波哥就答得好曖昧，話：「呢個我費事咩啦，大家自己去諗啦。」

翻查過去報道，波哥同大舊過去的確成日鬧交，兩人成日喺財委會上口角，唔止由朝早鬧到夜晚，仲會由會議廳鬧到立法會大樓走廊添。當年大舊鬧波哥係保皇黨同埋白癡，而波哥就反擊話大舊人渣，甚至鬧拉布議員搞到大家浪費時間喺議會「撳傻仔鐘」添。

另外，近排唔少人都不滿政府官員表現，波哥都話希望班官員可以提高答問水平。不過佢就話，班官員有時唔方便透露更多細節，但又要坐喺會議入面，形容佢哋好似一個機械人咁，建議佢哋應該要誠懇啲，唔答得就坦白啲講，仲話好多時大家咁都會收貨。