政Whats噏：斥盧偉國雙重標準　尹兆堅開火

立法會工務小組委員會「大塞車」，好多項目都要排隊，所以政府點定項目嘅優先次序固然好重要，同時小組委員會主席點樣主持會議都有好大影響，但主席盧偉國(WK)呢排主持會議就惹嚟唔少批評。

話說民主黨議員尹兆堅(肥尹)今日(4日)就喺委員會特別會議上，提到項目嘅先後次序問題，但WK話已經有其他議員提出過，所以整合咗幾句代為回應咗肥尹，結果肥尹喺第二次發言時就向WK開火，話自己當時時間未過，仲有幾十秒，質問佢點解唔畀官員回應，搞到佢聽唔到官員答覆。

跟住肥尹話起初只係想提醒番WK，唔好持雙重標準，但肥尹最後加咗一句仲叫佢唔好老羞成怒，結果呢四個字似乎觸動咗WK嘅神經，都唔理肥尹講完未就隨即否認，仲話身為主席就有責任保持會議進度，搞到兩人爭持咗近兩分鐘，肥尹叫WK唔好成日插嘴，WK就強調自己唔係插嘴，反駁話如果主席都唔出聲，個會咪就完囉！

最後WK似乎就唔想同肥尹拗落去，改為問佢仲有冇問題要問政府，如果冇就輪到下一位議員，肥尹排咗咁耐先到佢發言，點會冇啦啦浪費幾分鐘喺WK身上，所以佢都即刻收口，乖乖地問番工程相關嘅問題。睇嚟肥尹下次遇到呢啲情況，可能直接提規程問題，好過用自己嘅發言時間提出喇！

其實WK代官員答問題早有前科，間唔中都會喺會議上聽到「可唔可以畀番官員答？」之類嘅說話，唔少議員都有微言，而喺上星期飲食界議員張宇人喺審議北區沙嶺興建有機資源回收中心第二期時，都話過政府答唔到問題，多次追問後，WK仲「劃線」，唔畀佢繼續問，激到佢要提中止議程收場，相信今次肥尹都係吸收咗張宇人嘅經驗，先咁樣講啫！

睇嚟WK都要考慮吓自己主持會議嘅手法有冇問題，如果唔係，上次張宇人，今次尹兆堅，下次就唔知到邊個要開佢火喇！