政Whats噏:吳錦祥大學曾補考 被嘲讀得太Hea

2018年12月04日 15:18
東網電視
更多新聞短片
吳錦祥(左)出新書,找來葉建源(右)撐場。(譚敏聰攝)

近年本地大學生常被批評行為不檢,本身是醫生的社運人士吳錦祥笑言只係「小兒科」,指自己讀港大時亦十分曳,曾經捲入破壞校舍風波,港大校友、立法會議員葉建源指吳就讀法醫科時曾經要補考,指對方讀書Hea搞到唔合格,吳則死撐否認,辯稱只係想考好啲令成績好睇。

退休後去美國長居嘅吳錦祥回港宣傳佢嘅新書,已先睹為快嘅葉建源即場笑佢曾經要補考,「我讀大學都叫Hea,但係都未試過唔合格衰到要補考」,吳立刻反駁話並非唔合格,只係想考個靚啲嘅成績,引嚟哄堂大笑。

吳喺介紹新書時直認學生年代好曳,曾經捲入破壞校舍風波,指曾經呼籲搞抗議嘅同學唔好打爛窗同放火,「窗嘅玻璃碎咗會整傷自己,而火勢好易控制唔到。」對於近年大學生行為屢被抨擊,吳話對比起以往只係小兒科,批評今日社會太嚴苛,「學生做錯就打手板,唔應該要坐監負上刑責」。

當年係佔中十死士之一嘅吳錦祥,承認當年佔領行動「易發難收」,指如果早啲退場結果可能唔一樣,呼籲日後搞學生運動嘅人,勿讓激進因素騎劫影響。