政Whats噏：接垃圾徵費燙手山芋　傳馬逢國頂硬上

政府建議實施垃圾徵費計劃，並已將條例草案提交至立法會。負責審議有關法案嘅委員會聽日(5日)首次開會，將選出正、副主席。由於此條例草案極具爭議，委員會正、副主席位將不容有失，有消息指冇政黨背景嘅體育、演藝、文化及出版界議員馬逢國將接手呢個燙手山芋，出選主席職位。

立法會《2018年廢物處置(都市固體廢物收費)(修訂)條例草案》委員會聽日開會，料建制派會包攬正、副主席職位。惟民建聯過去對垃圾徵費有強烈意見，自由黨飲食界議員張宇人早前又喺工務小組拉布拉冧政府興建廚餘回收中心第二期嘅撥款申請，而出任立法會工務小組主席嘅工程界議員盧偉國近日主持會議方式又引起不滿，故委員會主席人選有指就屬意由獨立建制派議員捱義氣頂硬上。

需知面對咁具爭議嘅法案，委員會都有排開會，負責主持會議嘅主席位絕非筍工。喺報名時間截止前先加入委員會嘅馬逢國承認雖然佢一直支持引入垃圾徵費，但唔會主動爭取出任法案委員會主席，之不過如有需要都願意幫手咁話。