政Whats噏：為封殺峯鴿　建制推高佬賢落火坑

負責審議極具爭議嘅垃圾徵費條例草案嘅法案委員會今日(5日)召開首次會議，無政黨背景嘅體育、演藝、文化及出版界議員馬逢國喺無競爭下當選主席，但副主席一職就峰迴路轉。據悉建制派到最後一刻仍在變陣，包括喺收到風民主黨(白鴿黨)許智峯(峯鴿)要搶位後，「臨時拉伕」氹民建聯(民記)漁農界何俊賢(高佬賢)「落水」，最終喺建制派冧友下，高佬賢大比數當選副主席。

由於垃圾徵費喺地區反對聲大，面對明後兩年選舉年，建制派都難以「盲撐」，所以無直選議員有興趣做法案委員會正副主席，經多次磋商都冇最終定案。今日早上8時半同時有法案委員會同人事編制小組委員會會議，建制同民主兩派議員淨係冧友去開法案委員會，但大家都係施施然到來。

喺8時26分左右，法案委員會會議室內只有數名議員，環境局政治助理區詠芷(Michelle)密密打電話搵人，突然間佢好開心去同建制派議員講「佢OK、佢OK」，之後民記主席李慧琼就急急腳到會議室向其他議員拍膊頭話「高佬(賢)想做副主席」，而工程界盧偉國聽到後即捉住Michelle話：「佢唔係斷言拒絕㗎咩？」

會議開始後，高佬賢先急急腳入會議室，連恤衫衫鈕都係入到房先扣，睇嚟真係好突然決定頂上，而基於隔籬人事編制小組唔夠人，建制派一投完票就起行轉房。據了解，一度傳出會計界梁繼昌會參選，但及後卻變成峯鴿，令建制派有憂慮，坦言搶手機事件喺佢哋心內「有條刺」，為免喺無人競爭下畀峯鴿當選，大家積極游說高佬賢。

問到係咪臨急頂上，高佬賢否認兼笑指自己唔係「裙拉褲甩」開會，平時都係入到會議室先扣恤衫第二粒鈕。佢又強調呢條法例好重要，好多市民受到影響，認為一位唔太正常嘅議員難勝任副主席一職。好耐無做法案委員會主席嘅馬逢國就話都係本周一(3日)晚10時先決定加入委員會，及後「六人組」就游說佢做主席，今日朝開會前先睇文件添！

垃圾徵費難搞，建制派都心知肚明發生乜嘢事，但不論幾唔想接手，都唔想畀峯鴿做，惟有委以重任畀兩位無包袱嘅功能界別議員。正所謂「我不入地獄，誰入地獄」，高佬賢明知係火坑都要跳㗎喇！