政Whats噏：為呼籲打流感針　袁國勇出賣同行

冬季流感高峰期即將殺到，港島西醫院聯網為咗呼籲市民打流感針，不惜聯同港大微生物學系講座教授袁國勇夾手「出賣」聯網感染控制主任鄭智聰同瑪麗醫院副行政總裁徐錫漢，話假如聯網內有五成同事打流感針，鄭同徐兩位醫生就會跳舞，兩人已開始練舞準備做「找數真漢子」。

港島西醫院聯網以惡搞方式，拍咗一段約三分鐘嘅「歡樂滿一針」短片，搵嚟多位名人客串，包括在片首唱歌指打針可保平安嘅資深歌手陳潔靈、葉麗儀同藝人肥媽，及片尾彩蛋現身充當電話接線生嘅東華三院主席王賢誌等。

聯網亦高層盡出，總監李德麗扮演女司儀，袁國勇就做番自己，原本應負責講解流感針作用，但片中觀眾嫌佢長氣結果「飛片」了事，相當搞笑。另一爆笑位係聯網內有五成同事打流感針，鄭智聰同徐錫漢就要跳舞回報，畫面更顯示「要着泳褲和戴泳帽」，唔知兩位屆時「找數」時，係咪真係會表演泳裝舞呢？