政Whats噏:謝偉銓倡活化皇都 當年潮Look曝光

2018年12月06日 15:03
東網電視
更多新聞短片
謝偉銓拍片講活化皇都戲院。(謝偉銓fb)

歷史建築固然有佢嘅價值,但喺寸金尺土嘅香港,如果由得佢哋長期丟空又太浪費,所以近年都有唔少活化歷史建築嘅計劃,而立法會建築、測量、都市規劃及園境界議員謝偉銓(Tony)今日(6日)就喺Facebook貼咗條短片,內容講活化北角皇都戲院。事關皇都戲院係香港歷史最悠久嘅戲院建築,Tony喺70年代搬入北角後更加經常去皇都睇戲,佢讀緊書嗰陣都已經幫襯過唔少,好多港產片同大明星,例如梅艷芳、許冠傑、周潤發等都係喺皇都睇㗎!

其實唔單止見證香港娛樂事業最風光時代嘅皇都戲院極具歷史意義,Tony話戲院隔離嘅商場仲係當年嘅潮流指標,入面有好多洋服、髮廊、眼鏡等舖頭。短片又大晒Tony當年嘅潮Look,原來佢返工嘅裇衫、西裝、皮鞋等都喺呢個商場買,不過時至今日商場已經丟空哂,戲院都結業咗20年有多,Tony感慨自己睇住佢衰落,所以覺得應該活化,將咁具歷史意義同集體回憶嘅建築傳承下一代!