政Whats噏：陳肇始睇場　公仔演習豬瘟離地

非洲豬瘟喺內地肆虐，截至周一(3日)，疫情已擴至21個省市，香港唔少人亦擔心受到波及。食物及衞生局局長陳肇始星期二(4日)喺社交網站貼文話，去咗漁護署位於打鼓嶺嘅行動中心，視察該署為應對本地養豬場出現非洲豬瘟疫情嘅部署和演習，包括豬隻銷毀行動。

不過如果大家見到參與演習嘅豬，就一定唔多捨得銷毀，因為今次用咗相當得意嘅粉紅色豬形公仔做演習㗎，唔知呢啲豬公仔係咪真係被銷毀咗呢？參與演習嘅工作人員一人抬一隻粉紅豬，似乎忘記咗真豬隨時重過一個成年人，到底呢個演習有冇效？

據悉是次購買豬公仔花掉近2萬港元，陳肇始喺社交網站冇講到演習嘅過程係點，但從照片上睇到，呢批豬公仔似乎比真正嘅豬隻略為細小，相關人員全身着晒保護衣物，幫啲豬仔腳綁晒膠袋，現場又有分種豬舍、清洗區等，呢批豬公仔其後仲被抬走添！不過，似乎做戲做唔足全套，一隻真正嘅豬都相當重，見到啲工作人員一人一隻輕鬆抬豬，似乎有啲「離地」，不切實際！

陳就話，食衞局一直與內地有關部門緊密溝通，監察情況，嚴防非洲豬瘟傳入香港，已經喺入口、運輸及屠房等層面加強消毒清潔；本地農場亦已逐漸停用含動物源性嘅飼料，萬一本地出現非洲豬瘟疫情，政府會盡全力減低對本地養豬業嘅影響，會繼續留意疫情發展。